Tacú le ceannairí atá ag teacht chun cinn
9th December 2024
Tugann múinteoirí le fios i gcónaí go bhfuil tacaíocht ó phríomhoide na scoile ina phríomhghné ratha i gcur i bhfeidhm na foghlama digití ina scoil. Ach ní féidir le ceannairí scoile gach rud a dhéanamh iad féin agus mar sin ní mór dóibh bealaí a aimsiú chun tacú le ceannairí atá ag teacht chun cinn maidir le foghlaim dhigiteach a threorú.
Tá sé tábhachtach go mbeadh daoine eile sa scoil atá toilteanach agus in ann foghlaim dhigiteach a threorú chun an fhoghlaim dhigiteach a fhorbairt go leanúnach. Beidh roinnt ceannairí scoile in ann freagracht as foghlaim dhigiteach a tharmligean chuig ceannaire eile, ar nós an leas-phríomhoide. Fiú murar féidir é seo a dhéanamh, beidh go leor scoileanna in ann foireann foghlama digití (foireann FD) a chur le chéile sa scoil. Roinneann an cur chuige seo freagracht agus cuireann sé clár foghlama digití chun cinn trí cheannaireacht dháilte.
Tacú le ceannairí atá ag teacht chun cinn róil cheannaireachta a ghlacadh
Is príomhról don phríomhoide mar sin é an fhoireann a chumasú chun róil cheannaireachta a ghlacadh agus a chomhlíonadh, mar a leagtar amach sa Chreat Foghlama Digití (tag: Gné Ceannaireachta agus Bainistíochta, réimse 4, caighdeán 2).
Ach conas is féidir le príomhoide foireann a chumasú chun róil cheannaireachta a ghlacadh agus a chomhlíonadh? Bealach amháin is ea tacaíocht a thabhairt do cheannairí atá ag teacht chun cinn, ar nós baill na foirne FD, chun tabhairt faoi fhoghlaim ghairmiúil a chuireann ar a gcumas, dá réir sin, ról ceannaireachta a ghlacadh.
Cúrsaí ar Líne agus Uaireanta Pháirc an Chrócaigh
Tá trí phríomhchúrsa ag Oide Teicneolaíocht san Oideachas sa réimse ceannaireachta a fhéadfaidh rannpháirtithe a chumasú chun foghlaim dhigiteach a threorú ina scoil. Rud atá an-tábhachtach ná gur féidir le bainistíocht na scoile tacú le múinteoirí agus iad ag tabhairt faoi na cúrsaí seo trí shocruithe chun a n-uaireanta Pháirc an Chrócaigh a úsáid le haghaidh staidéir neamhspleách, agus b’fhéidir am breise a chur ar fáil don fhoireann FD le teacht le chéile chun machnamh a dhéanamh ar ghníomhartha ina dhiaidh sin.
Is iad na cúrsaí féinluais ar líne is féidir a rangú mar chúrsaí ‘Ceannaireachta’ ó Oide Teicneolaíocht san Oideachas ná:
- Foghlaim Dhigiteach a Threorú (ceithre uair an chloig). Cúrsa riachtanach d’aon duine atá i gceannas ar an bhfoghlaim dhigiteach sa scoil agus a thugann forléargas ar mhór-réimsí imní. Is féidir leat scimeáil tríd, ag caitheamh níos lú ná ceithre uair an chloig, mura bhfuil uait ach forléargas nó meabhrúchán ar ghnéithe áirithe.
- Plean Foghlama Digití a Fhorbairt do do Scoil (ceithre uair an chloig). Treoir céim ar chéim tríd an bpróiseas pleanála FD ina iomláine – do cheannairí scoile agus/nó iad siúd ar an bhfoireann foghlama digití a bhfuil freagracht tharmligthe orthu as an bplean FD a fhorbairt/a nuashonrú.)
- IS do Scoileanna (uair an chloig). Réamheolas gairid agus riachtanach ar IS do cheannairí scoile chomh maith le baill foirne FD.
Is féidir leis an bpríomhoide an fhoireann FD a éascú freisin chun a gcuid foghlama, agus aon tionscnaimh nua a d’fhéadfadh a bheith mar thoradh uirthi, a roinnt le foireann iomlán na scoile le linn uaireanta Pháirc an Chrócaigh. I dtaca leis seo, is spreagadh díospóireachta úsáideach iad na físeáin dea-chleachtais atá sna cúrsaí thuas.
Caighdeáin an Chreata don Fhoghlaim Dhigiteach
Má dhéantar na céimeanna a leagtar amach thuas chun ceannaireacht dháilte a chumasú agus tacú léi, is mór an cuidiú a bheidh ann i dtreo na gcaighdeán ‘Cleachtas Éifeachtach’ (réimse 4, caighdeán 2) sa DLF, a luaitear thíos, a chomhlíonadh.
Spreagann an príomhoide agus ceannairí eile sa scoil múinteoirí chun róil cheannaireachta a ghlacadh agus úsáid na dteicneolaíochtaí digiteacha don fhoghlaim, don teagasc agus don mheasúnú a threorú, agus tá sé/sí toilteanach freagrachtaí suntasacha ceannaireachta a dháileadh.
Forbraíonn siad struchtúir eagraíochtúla chun comhroinnt cleachtais agus piarmheantóireacht a éascú agus a spreagadh in úsáid na dteicneolaíochtaí digiteacha don fhoghlaim, don teagasc agus don mheasúnú.
Sainaithníonn siad agus tacaíonn siad le deiseanna don fhoireann chun dul i ngleic go gníomhach leis an bpróiseas chun acmhainn dhigiteach agus úsáid nuálach a fhorbairt, agus dul i ngleic le taighde.
